Ադրբեջանի ԱԳՆ-ն մեկնաբանել է ՀՀ ԱԳՆ-ի այսօր տարածած հայտարարությունը, որը, նրանց խոսքով, «արդարացնում է Հայաստանի սպառազինման ջանքերը»։

«Ինչ վերաբերում է այն պնդմանը, որ զանգվածային սպառազինության քաղաքականությունը Հայաստանի ինքնիշխան իրավունքն է, նշենք, որ բոլորին պետք է հայտնի լինի, թե ինչու են Հայաստանի ձեռնարկած այս քայլերը ոչ լեգիտիմ և սպառնալիք ներկայացնում մեր երկրի համար»,- ասված է Ադրբեջանի ԱԳՆ հայտարարության մեջ։

 Դրանում նորից խոսվում է այն մասին, որ «Հայաստանը 30 տարի կոպտորեն խախտել է միջազգային իրավունքի նորմերը և սկզբունքները, խախտել Ալմա-Աթայի հռչակագիրը, որին այսօր բազմիցս հղում է անում, «ագրեսիա» է իրականացրել Ադրբեջանի տարածքային ամբողջականության և ինքնիշխանության դեմ, շարունակել իր տարածքային հավակնությունները հարևանների դեմ և դադարեցրել իր ագրեսիվ գործողությունները հենց Ադրբեջանի ձեռնարկած քայլերի արդյունքում»:

Ադրբեջանի ԱԳՆ-ն Հայաստանի խաղաղ երկրի իմիջը համարել է «քաղաքական մանիպուլյացիա»:

«Ավելի լավ կլիներ, եթե հայկական կողմը, որը հղում է անում 1991 թվականի սահմանների և Ալմա-Աթայի հռչակագրի հիման վրա տարածքային ամբողջականությանը, բացատրեր, թե ինչու չի հետևել այդ պայմանագրերին ավելի քան 30 տարի, հրաժարվել է ճանաչել խորհրդային քարտեզներում արտացոլված սահմանները և գրավել է Ադրբեջանի տարածքները»,- ասվում է Ադրբեջանի ԱԳՆ հայտարարության մեջ։